A Deputación da Coruña condeceu á Asociación Agaela a cantidade de 13.089,29€ para financiar o 80% do programa de orientación, apoio e asesoramento a persoas con ELA, persoas coidadoras e familiares, por medio da convocatoria do programa de subvencións a entidades sen ánimo de lucro para o mantemento de programas sociosanitarios durante o ano 2023.
O obxectivo deste programa é mellorala calidade de vida das persoas con Esclerose Lateral Amiotrófica, residentes na Provincia da Coruña ofrecendo un servizo de orientación, apoio e asesoramento aos usuarios, aos seus coidadores e familiares.
Os obxectivos específicos son:
- Asesorar sobre as necesidades vinculadas ás diferentes fases da enfermidade e dar acceso aos recursos público/privados dispoñibles.
- Manter o mellor grao de autonomía persoal posible e diminuír a dependencia dunha terceira persoa.
- Diminuír a sobrecarga do coidador principal.
- Dar soporte e apoio aos familiares e coidadores no proceso de evolución da enfermidade.
- Garantir a igualdade de oportunidades entre homes e mulleres con diversidade funcional no acceso a diversos recursos.
- Garantir a continuidade e seguimento do programa cos adecuados criterios de calidade.
As tarefas a realizar enmarcadas no proxecto son as seguintes:
- Valoración inicial de necesidades dos usuarios
- Orientación sobre o proceso da ELA
- Asesoramento sobre trámites sociais
- Tramitación de solicitudes de axudas e posta en marcha de recursos
- Asesoramento sobre o uso e adquisición de produtos de apoio
- Asesoramento sobre accesibilidade e adaptación do fogar
- Orientación no uso de dispositivos de apoio para a comunicación
- Asesoramento sobre hixiene postural e técnicas de conservación da enerxía na realización de mobilizacións e transferencias
- Apoio psico-emocional e escoita activa para fomentar a descarga do coidador
- Reavaliación e seguimento individualizado das necesidades
